ديوان الشاعر -محمد بن ناصر السياري الخالدي -رحمه الله -

[ابو دريع]

عليت ياقلب عليه الوصل طـال=جفت شرايينه ويبست عروقـه
وأنا أشهد إنه للأسيـات حمـال=يجيه ساعـات تشيـن وفوقـه
كنه على الما واقف بأشهب اللال=وهو يشوف الما ويعجز يذوقـه
طاول عليه الوقت بقفاي واقبـال=وحضه ردي وكل شـي يعوقـه
يازين عطني غايتك واشرح البال=روحي لروحك ياحبيبي شفوقـه
لاتسمع الحاسد ولا شور عـذال=إرجع على قلبي وسدد فتوقـه .

[ابو دريع]

كتب هذه القصيده في اخيه المغفور له بإذن الله-صقر بن ناصر السياري الخالدي




يا من يهدي القلب يـا مـن يهـدي=قلب(ن) عروقه وصلها مـا كفاهـا
بينه وبين العيـن حـرب وتحـدي=لا زاد شـره نثـرت كـل ماهـا
لا قلت كفـى يالحبايـب وصـدي=عن بعض الاشياء غاب عنها عزاها
هميلهـا لـو ان مـا هـوب ودي=لا شك هاجوس الضميـر يحدهـا
وصلت من كثر الهواجيـس حـدي=ونفسي على ما فات لحقـت مداهـا
مـا دبـر الله مالـه احـد يـردي=يامر وتمشي دبرتـه فـي قضاهـا
في كـل يـوم صورتـه تستجـدي=ولا شفتها جابـت لعينـي عماهـا
لاعتني الدنيا على (صلـب) جـدي=ياعاذليـن النفـس عـن منتهاهـا
أدري ابمكنونـه ويـدري ابسـدي=أيتام عشنا فـي السنيـن ورداهـا
ما من رفيـق ولا صديـق يقـدي=كـل ابنفسـه شايـل مـن غثاهـا
لو لا الله ابرك ثم حضـرة مـودي=(ابـو مهنـا) شـال عنـا شقاهـا
سعد الرفيق اللي عن الحـق عـدي=(الاشهب)اللـي فزعتـه لقربـاهـا
عقاب(ن) على روس النوايف يعدي=وطلعه على ربعه وعينـه وراهـا
ما شفت ابوي وصاروا الناس ضدي=والناس بيـن احبابهـا وازملاهـا
ليما بدا نجم السعـد واجـر هـدي=وصارت لنا الدنيا علـى مستواهـا
دنيا كفـى الله شرهـا مـا تمـدي=توجس مرارتهـا تخالـط حلاهـا
لا شفت حظـك بالجمـال متعـدي=فحسب حساب المقبـلات وعناهـا
تعطيـك وجـه بالبشاشـه ينـدي=وتعطي عراقيـب بصفقـة قفاهـا
وين الفـوارس صامليـن المهـدي=اللي ركايبهم شكـت مـن حفاهـا
الكـل منـهـم للـقـا مستـعـدي=قطاعـة الفرجـة طـوال خطاهـا
واليا تردى الحـظ جالـه مصـدي=نـاس تجـي حذفاتهـا بمغـزاهـا
يمـوت حظـه والركايـب تشـدي=ودار(ن) نصاها قدرته من حصاها
شـي لصنـدوق الضمايـر يعـدي=دنيـا تجـي ميلاتـهـا بمعـداهـا
هـذا تعشـابـه وهــذا تـغـدي=وهذا تحدى لـه وتقصـر اخطاهـا
الحظ فـي تالـي الحيـاة متـردي=فراق شمـل احبابهـا وعضداهـا
مرثية(ن) مـن كامـلات المشـدي=علـى حبيـب(ن) وثقـوه بجباهـا
هذا كلامي حيـن صـار التحـدي=على عيون(ن) قربت مـن عماهـا

[ابو دريع]

أنا من طبعي الأول=مناب ارضى مع التالي
ولا أرضى بالردا كله=ولا أسمع شور عذالي
وأخلي النذل في فاله=وأنا فال السعد فالي
وأخلي المسلك الواطي=واعد النايف العالي
وأحب الطيب وأمشي به=ولوه تعيب يحلالي
أعرفه من تجاريبه=تمر جداد وسمالي
دروب الطيب مدهوله=منيب أول ولا تالي
ولاكني من الواجب=أخليها على بالي
ودروب البخل أجنبها=وأخليها للأنذالي
وأنا رزقي على الباري=وهو للكود حلالي

[ابو دريع]

يـا ليتنـي يـا رشـيـد راعــي ربـابـة = اجرهـا ليـا ضـاق صــدري واغـنـي
اقـنـب عليـهـا مـثـل عــود الذيـابـة = لا اخطا العشا وسبوق رجله قضن
علـى وليـف صاطـى بــي صـوابـه =الله لا يـجـزيـه بـــا لـخـيـر مــنــي
ان غـاب جتنـي علتـي مـن غيابـه = لـيـن الـجــروح الخـافـيـة يـظـهـرن
والـى حضـر عزيـت روحـي مهابـه = مــا ودي العـربـان يـــدرون عـنــي
عنـي نهـار السـبـت قـفـت ركـابـه = وقفيت عنـه وخاطـري مـا ارجهـن
عـل الحيـا يسقـي تـراب وطـا بــه = لو كـان حقـي منـه رمـح المطنـي

[ابو دريع]

هذه القصة جرت على الشاعر الكبير محمد ناصر بن صقر السياري والشاعر الكبير سويلم العلي السهلي رحمهما الله، حيث كان بينهما صداقة قوية وعلاقة طيبة، حيث كان الشاعر محمد السياري ساكناً في بلدة ضرما وسويلم العلي نازلٍ ببيته بجوار السياري وكل منهما يزور الثاني ويجتمعان على القهوة ويتبادلان السوالف والأشعار . . وفي يوم من الأيام سافر سويلم العلي إلى الكويت . . فتذكر الشاعر السياري صديقه سويلم وتذكر منادمته وقال هذه الأبيات:-



يامحلا المسيـار فـي وقـت حلـه=يفرح الـى منـك دخلـت بمحلـه
يابـو محمـد كـل مافـات خلـه=وان صابك الحق المصيب انضغن له

وعندما حضر سويلم السهلي من سفره من الكويت سير للسلام على صديقه السياري وإذا هو مسجل الأبيات بالمسجل ولما دارت القهوة وكلٍ اخذ اخبار الآخر سمع سويلم الأبيات فأجابه سويلم العلي بالأبيات الآتية:-




قال الذي لاقال قيـلٍ فطـن لـه=حرصٍ على بنية معانيـه كلـه
يبي ليـا قـام المسجـل يهلـه=بيـوتٍ مسجلـه محمـد لعلـه
ابن صقر له مجلسٍ مـا تملـه=كم كبش مصلاح يجي به يتلـه
يابو فهد مافـات وازيـن دلـه=فيه الشبـاب وفيـه لـذه بحلـه
واما من الحق المصيب ارتحل له=هذا زمـانٍ فيـه جيـلٍ تملـه

[السياري الكويت]

ابو دريع يالغالي بيض الله وجهك علي هالموضوع وتسلم ايدك
ورحمة الله علي شاعرنا واسكنه فسيح جناته اللهم آمين
الف شكر ابو دريع

[السياري الكويت]

قصيدة اعجبتني وان شاء الله تعجبكم

إما حصل وزنٍ وصورة ومعنى,,,,,,ترى قصيدك ينقدونه هل الذوق !!

ياللي تخالف بالهذر مجتمعنا,,,,,,,تسلب وتكسر وانت بالقيل مسبوق !!

تقول:حنا بالقوافي بدعنـــا؟؟,,,,,وبضاعتك ماتربحك ليجت السوق !!

ليت المكاتب ترفض اللي سمعنا,,,,,الغث كثر وكل مطرود ملحوق !!

وين المحرر ياقف اليوم معنا؟؟,,,,,,ميزان عدلٍ فاهمٍ كل منطوق !!

اما على كل الحقايق طلعنا,,,,,,,,ضاع الهدف مابين عاتق ومعتوق !!

حنا عن الشعر الحديث ارتفعنا,,,,,ليصار مستهجن وعايب ومسروق !!

وحنا الى شفنا المجله جزعنا,,,,,,الشعر يزحف صايب ٍ رجله العوق !!

يبي يضيع اتراثنا اما فزعنا ,,,,,,,,ياناس شعر الحر مايجذب الشوق !!

لو الشعر هين جلبنا وبعنا ,,,,,,,, مير الشعر كاااايد له احكام وحقوق !!



شعر / ناصر بن محمد بن ناصر السياري الخالدي
دمتم بحفظ الله ورعايته