تكفى .. ترى تكفى تهز الرجاجيل

[العلوي الحربي]

هذي طبوعي كل ما عسعس الليل=أصلّـح الدلـة وأجـر اللحونـي
بريـةٍ موزونـة البـنّ والهيـل=والماء بوزن وحيّ هاك الوزونـي
منهـا تكيّفنـي ثلاثـة فناجـيـل=وأرتاح ويطير السهر من عيونـي
وأراجع الذكرى وأجـرّ المواويـل=والذكريـات بكـلّ شكـلٍ ولونـي
البعض منها يشرح الصدر بالحيل=والبعض لا والله يجـدد طعونـي
وأرجع وأفكّر في الليال المقابيـل=لعل وقتـي مـا يخيّـب ظنونـي
وأدخل على الله من حياة الغرابيل=حيث إن همّي ما تشيلـه متونـي
كنّك مفصّل فوقي الهـمّ تفصيـل=لين إلتبسني مثل لبـس الجنونـي
حالي كما حال القلوب المشاغيـل=اللي من أطرف شـيء يتأثّرونـي
لو يشتكون الغبن والجور والميـل=للغيظ وسط صدورهـم يكتمونـي
فكّرت الا الموضوع يحتاج تحليـل=وفنّ الدراسة واحدٍ مـن فنونـي
عرفت وش عكّر مزاج المشاكيـل=يوم إنهم مـن وقتهـم يشتكونـي
أول سبب: نقالـة القـال والقيـل=الطغمة اللـي جعلهـم يذهبونـي
قلوبهـم بالحقـد سـودٍ مغاليـل=ومن طبعهم بالمشكلـة يفرحونـي
وثاني سبب: ناسٍ على مثل ما قيل=لا يقطعـون الشّـر ولا ينفعونـي
والله ما يرفع ضغطك إلا المهابيـل=العالم اللي في النحـر ينشبونـي
وثالث سبب: ناسٍ سوات المخاييل=على سلوم الطّيب ما يحرصونـي
خلّو سلوم أجدادهم رغو مع سيـل=وفي عالم التقليد جـو يركضونـي
طشّوا عمايمهم ولبسـوا بناطيـل=والموس فال أشنابهـم والدقونـي
وأرقابهم ما سلمت من السلاسيـل=تطبّعـوا بطبـوع هيـم البطونـي
في ذمتي ماعـاد باقـي رياجيـل=إلا القليـل وجعلهـم يثبتـونـي
صفّة بعد صفّة وجيلٍ بعـد جيـل=كلٍ من اللي قبله أنقص وأدونـي
هذي هي الأسباب من دون تفصيل=شرحت روس أقلام بس أعذروني
واللي يبي تفصيل بالحيل بالحيـل=يقـدر يكلمنـي علـى تيلفونـي


منقول لشاعر مجهول
وياليت من يعرف قايلها يعلمنا عنه

[الخلاوي]

أول سبب: نقالـة القـال والقيـل
الطغمة اللـي جعلهـم يذهبونـي
قلوبهـم بالحقـد سـودٍ مغاليـل
ومن طبعهم بالمشكلـة يفرحونـي


تسلم يالعلوي على هالنقل الطيب وقصيدة تكتب بالغالي

[المستشار]

الاخ الكريم العلوي الحربي
السلام عليكم ورحمة الله وبركاته
قصيدة رائعة وصح لسان قائلها . فالشاعر بدأها بقوله انه ليليا يسهر مع الدلة المبهرة ويكتفي بثلاثة فناجيل ويجر معها اللحون الحزينة ترافقها تلك الذكريات المختلفة اشكالها والوانها التي لا تبارح مخيلته ابدا . كما ان الشاعر يشتكي من الهموم والغرابيل التي تحيط به من كل جانب , بعد ذلك حدد الشاعربعد التحليل ان هناك اربعة اسباب رئيسية وراء تعكير صفو المزاج وكثرة شكاوي الناس وهي : اهل النمائم الذين يو قعون بين الناس وكذلك اهل الشر الذين لا يكفون اذاهم عن الناس وفي نفس الوقت لاينفعون احد , وايضا الناس الذين لايحبون الطيب ولا يسلكون طريقه . والسبب الرابع هو تشبههم بالغرب من حيث اللباس وترك عادات ابائهم واجدادهم . ثم ختم الشاعر قصيدته بقوله انه لم يعد هناك رجاجيل كما كان في السابق . كما اضاف الشاعر ان الجيل ينقرض وياتي جيل بعده ومع الاسف فان الصفات الحميدة تتناقص بانقراض الاجيال . مااحسن هذه القصيدة التي تعبر عن واقع ملموس تعايشه الاجيال . والقصيدة تتميز بترابط الافكار وسهولة الفاظها وعباراتها المؤثرة وقافيتهاالمعروفه السلسة علما ان ابيات القصيدة موزونة والقصيدة بشكل عام ممتازة ولها جرس موسيقي تستمتع وتطرب له الاذن . والسلام عليكم .