كيري ولا بوش

[إبن الخنساء]

ياكثـر مافينـا دراويـش وخْتـوش = وياقل منـاّ مـن فهـم بالاشـارة

وياكثر مافينـا وجاهـات وكـروش = وياقـل منـاّ مـن يعيـش بجـدارة

نلبس مذلّتنا على الـراس طربـوش = ونقول حناّ سـاس كـل الحضـارة

مصيرنا يصرخ على كف مربـوش = يعوث فينـا عـوث ذيـب المغـارة

وش عاد كيري فاز والاّ انتصر بوش = كـل الـدروب إتقودنـا للخسـارة

مافيه بالكفّـار أصلـي ومغشـوش = واحـد هدفهـم ماتـهـم العـبـارة

بقلوبهم كره العرب رسـم منقـوش = مافيهم اللي فـي ضميـره طهـارة

ياللي سهرت الليل حاضن لك دشوش = إتّابع الأصـوات فـي كـل حـارة

من ينتخب كيري ومن ينتخب بـوش = ومن رشحوا للكونقـرس والـوزارة

عزاه ياأمـة لمثلـك هي إتحـوش = أليـن عيشتهـا زهـود ومــرارة

المجـد ماياتـي بخدعـة ودنبـوش = المجد عزم رجال مـوت وجسـارة

المعتدي لاصار ضاري على الهوش = مايردعـه لطـف القبيـل إوّقـاره

مايردعه غير المدرّب على النـوش = يكسـر مجاديفـه وينفـض غبـاره

المسكنة ماتهـزم سْـلاح وجْيـوش = والظلم مالـه غيـر دحـر ونمـاره

درب الشرف ماهو بالأزهار مفروش = رحلة كفاح ومـوت ماهـي زيـاره

العز مايُشـرى بجاهـات وقـروش = العـز نـارٍ تلتهـب بالـحـرارة

نبغى طـرب والبرتقالـة وعلّـوش = ماهـي بشايـر خيـر إلاّ دعـارة

كم ضاع منّا مجد وانهارت عـروش = وكم مات حلم وكم تهـاوت منـارة


شعر \ حمدان بـن سالـم العنـزي
منقول