وترى المرجلة تصعب على الهابي الدنفوس

[العلوي الحربي]

ليال الشدايـد لاقسـت مثـل حـد المـوس=تخلَـي سليـم العقـل والقـلـب يرتـابـي
ومنهـا فوايـد تظهـر الواقـع الملمـوس=وتعلَم لبيـب القلـب عـن سرَهـا الغابـي
فأنا خذيت من سود الليالـي عبـر ودروس=وسجَلتهـا عنـدي علـى صفحـة إكتابـي
بعد ماكشر وجه الزمن وأظهـر المدسـوس=عرفت وفهمت الفرق من بيـن الأصحابـي
فألاصحاب ماتنقـاس بالشكـل والملبـوس=الأصحاب تظهر في اللـوازم والأصعابـي
فصحيبٍ ليا منـي نصيتـه وأنـا محيـوس=لقيتـه علـى الميقـاف للطيـب كسَـابـي
سوا إني بغيـت الجـاه وإلأ بغيـت فلـوس=كما الشيك عندي ضامنـه داخـل إحسابـي
وصحيبٍ ليا جيته تعـذَر وحاسـك حـوس=عـذاره كثيـره وأكثـر الـظـن كـذَابـي
ينافـق وقلبـه شامـخٍ بالـردى مغـروس=ولـو كـان ودَه ماقـدر فعـل الأشنـابـي
فألأشناب تحصد كلمة النعم غصب وجـوس=قروم الرجال اللـي بهـا المـدح ينسابـي
وترى المرجلة تصعب على الهابي الدنفوس=وتسهل على اللـي بالوفـاء تعشـق النابـي
وترى الرجل لاأخطى في شبابه من الناموس=صعيـبٍ عليـه الطيـب يانـاس لاشابـي
وترى الضرس يضعف كل مادبِ فيه السوس=وترى البيـت مايبنـى بلاأعمـادِ وأطنابـي
ومن لارفع رآسـه مـع رافعيـن الـروس=فأنـا بأشهـد إنَـه مفلـسٍ دام ماطـابـي
وحرامٍ علـي ياواحـدٍ بالـردى مغمـوس=لاأجنَب عنه وأبعد ولو هـو مـن أقرابـي
وهـذي نتيجـة واقـعٍ حاصـلٍ ملمـوس=جرالـي ودونتـه علـى صفحـة إكتابـي






وسلامتكم جميعاً أخوكم دغش الدوسري

منقول من منتديات التراث