ملاحـــــــــــم بـــــــــني خـــــــالـــــــــد الشعـــــــــــريه( 551)بيت

[^نايف]

بسم الله الرحمن الرحيم
الحمدلله والصلاة والسلام على رسول الله وعلى آله وصحبه أجمعين
وبعد
فهذه الملحمة الخالدية للشاعر /محمد بن سعد بن غشام الجناحي الخالدي

بسم منزل الأعراف والطّور والفرقان
جعل محكم الآيات في محكم سورها
تباركت يالرحمن يالمعطي المنّان
وباسمك بديت أبيات شعرٍ مصادرها
من الهاجس اللي لا انفجر كنه البركان
يذوّب صخور الأرض ويرمّد أخضرها
ولامن تنهّد فاح فوحه كما الدخّان
من علوم صدرٍ قام يكثر تسعّرها
ولامن تهيّض للشّعر مايجي عجلان
يصفّ المعاني صفّ ثم يتخيرها
فلا يانديبي فوق خطّافة الأعيان
لها صورةٍ بالشّعْر ما احدٍ يصوّرها
لطيّ الأراضي جهّزوها هل اليابان
وجت مثل ما أرادوا وزادت تبخترها
بعد جمّعت بأوصافها "الجيب"و"السيدان
"أنا ما هقيت أحدٍ يبا يجهل جررها
عليها نديبي يسرح الصبح من "شامان"
قبل ماتبين الشّمس والأرض تسفرها
من أرض"القويعية"سرح لأجل شانه شان
و"للعاصمة"وجّه ذلوله وسيّرها
عطيت النّديب الخطّ وإلا ترا العنوان
يعرفه كمنّ الشمس ماعين تنكرها
توجّه لدار معزّب الرّبع والضيفان
سليل الرّجال اللي فَخَرْها من سيرها
توجّه لدار الشيخ و اقلط معه يافلان
وبلّغ سلامي والتحيات كررها
تحيّات فيها المسك والشيح والريحان
وبالورد والكادي ثناها معطّرها
وبعد ما تسلّم لي عليه أعطه القيفان
وقل له ترا هذي القصيدة محررها
محمد ولد غشّام" وأصله من "الجنحان"
وقل :ماعليكم زود،والقاف صدّرها
لشيخ البديدة طير حوران ابن حوران
وشيخة "بني خالد"بقت في "عريعرها"
وهو"خالد"السرحان ابن"نايف"السرحان
أمير"الخوالد"حَضْر وضعون وأشهرها
كريمٍ كما الهدّاج للبدو والحضران
ذهينٍ فهيمٍ والمعادين يقهرها
سلالة رجالٍ حكمها فالجزيرة بان
ميات السنين ومااحْد يقدر يقهقرها
رضت ورضخت للواقع"الترك والسلطان
"بعد عجزت تزيح "الخوالد"عن ديرها
وعجزت تناوشهم يد الحَضْر والبدوان
ياكيف يتناوش طايل القوم قاصرها
"بني خالد" اللي كل ما ميّل الميزان
رسوا مثل ما ترسي البسيطة عناقرها
لهم دولةٍ تدري بها "الترك"و"الرومان
"وأبفخر بها وأذكر طرف من مفاخرها
"ضناهبس"حبس الدار عن طمعة إنس وجان
ما احد غيرنا بيض الحباري يحيّرها
من "عمان"إلى"عمّان" مع "نجد" و"الصمّان"
من "السِّيف" إلى قلب "الجزيرة" نسيطرها
علوم"الخوالد"فعل، ما هي قلم ولسان
علوم"الخوالد"تتعب اللي يزوّرها
علوم "الخوالد"كيف يطرا لها النسيان
ومن يدّعي نسيانها غصب يذكرها
بدا حكمنا باللي لهم هيبة وسلطان
بدا "بالجبور"اللي هل الدين تشكرها
حموا "ديرة الإسلام"عن"سربة الصلبان"
تجيها الأساطيل الكثيرة ونحشرها
من "البرتغال"جيوش تاتي بلا حسبان
لَكَنَّ "الخوالد" بالمراهيف تحصرها
ويا كمّ راهب طرْح راسه عن الأمتان
يحسْبَ الجزيرة تحتري له ينصّرها
ولو يعلم أنّه تحتري شوفه الظفران
تراجع على صلبانه العوج يكسرها
لَكَنَّ الله أرسلنا كما الموت للرهبان
والأقدار ما تقدر تخالف مقدّرها
وياكم ردّينا"النصارى"عن أرض"عمان
"بحدب النّمَش ماهوب بأموال نهدرها
100عام وأكثر ، دولةٍ تحكم البلدان
وتنحّت ولكنّ أختها جت على أثرها
وعمر أختها قرنين،وجا جمعها وكدان
ثلاثة قرون، وربّي اللي معمّرها
بدا حكمها "زامل" ، وهو مخْلي المرحان
صميدع ونيبانه لخصمه مكشّرها
زحف"للدواسر"و"آل عايذ"على الغدران
بجيشه وحاز الدّار وأستاق أباعرها
وجاها بواديها وراضته بالذيدان
وبالخيل والأموال حتّاه يعذرها
وصبّح على"العتش""الفضول"ومن الدمّان
ماعاد تعرف ويش أخضرالأرض وأحمرها
وأباد"الزّعوب"ومن فزع من"هل الزبلان"
تبي تفزع ودارت عليها دوايرها
وغزا"سبيع"و"آل مغيرة"وخذهم كحيلان
وطفّى منايرها ولا نار نايرها
وبعده حكم "سيف" ابنه الفارس الطعّان
وجيهٍ يهللها و وجيهٍ يمعّرها
وأخوه"أجود"المعروف كاسرجيوش"إيران
"وتَعَرْفه ديار"الخرج" وإيّا "دواسرها"
وهو اللي لفَتْه "آل المغيرة" تبي الغفران
وياكمّ زلّة و"أجود" القرم يغفرها
ونشر سنّة آخر مرسلٍ بآخر الأديان
نشر سنّة المختار في "هجر" وهجرها
وهو في ثواب الخالق المعتلي طمعان
وعساه بجنان الخلد مغموس بأنهرها
وبعده ولده "محمد"على الوغى شفقان
دروبٍ يسهّلها ودروبٍ يوعّرها
وجا بعدهم "مقرن" وهو كاسر العدوان
هو اللي حمى سيف الجزيرة وسوّرها
وأغاث "الشريف" بجيش مثل الرّعد دنّان
ونصرسربة"الأشراف""مقرن"وصاهرها
وكسرمن جيوش"الروم" أساطيل ماتنهان
حمى "ديرة الإسلام" لأنه غضنفرها
مجاهد معاهد واثقٍ بالله الرّحمن
شهيدٍ شرى الجنّة بنفسه ودوّرها
وذبحنا فدى"لمقرن" ملك "هرمزٍ" "طوران"
هو الشاه شاه الفرس ثم عوّد أحقرها
وبعده حكم عمّه "علي" وأوقد الضيّان
وإذا قربت العدوان ، بالسّيف شطّرها
وبعده حكم "ناصر" حكيمٍ وسيع بطان
و"ناصر" ثلاث سنين بالدين ناصرها
وبعده حكم "قطن" المسمى بحدّ الزان
ربوعه تنام بخير وعداه يسهرها
و"قطن" أحتمى الدولة بسيفه وبالحيطان
وبعده"غصيب" اللي حكمها بأواخرها
لكنّ "الخوالد" طبعها توفي الديان
تفرّ وتكرّ وتنحر اللي يناحرها
وشاعر "بني خالد" قحص وأعلن الإعلان
وجتْه الشيوخ اللي الزمن ما يغيّرها
ولفى الشيخ "براك الغرير" ومعه خطلان
الأيمان قومٍ مرهفاتٍ شواطرها
و"برّاك" هجّد جيش دولة"بني عثمان"
وفرض نفسه بسيفه على"الترك"وأجبرها
تهوّن عن مناطحْه فالبحر والبرّان
كمنّ البحر ربعي حمته ببواخرها
و"برّاك" مابه شك ناره على النيران
له أفعال لو كانت لغيره تكاثرها
قطع راس أمير "المنتفق" يوم حكمه زان
وهو"راشد بن مغامس" أقوى عناترها
وأمير "الظفير" أسير عنده بلا جحدان
"سلامة بن سويط" المحابيل جرجرها
ونازل"بني سهل"برماح ونصى "قحطان
"على"الحرمليّة" وأعترك مع "جحادرها"
وشاعر "تميم" الشاعر الماهر"رميزان
"مدح فعل "برّاك" بهناديب سطّرها
وجا"محمد بن غرير" وأعطى الديار
أمان ولن عاندته النّاس هجّد مثوّرها
مثل مافعل "بالخرج" في سربة "العثمان
"ومعها "الفضول" ومن فزع يوم خسّرها
وكسرسربة"العسّاف" مع سربة "النبهان
""بحاير سدير" وعادة الشيخ يمخرها
و"سعدون"بعده شدّ محزَمْه ، أبد ما لان
وشاعره "راعي البير" قيفانه أظهرها
أخذ"زعب" في هيّة و ودّب هل العصيان
و"فالحجرة" جموع "الظفيري" محجّرها
و"بترا نفود السرّ" تشهد نهارٍ ثان
به"فضول"وجموع "الظفيري" تضافرها
وشال المدافع وسط جيشه عيان بيان
ودكدك بها "آل كثير" واللي يقاصرها
وبعده "عليّ" أخُوه ثمّ أخْوه "سليمان
"وهواللي مع "الحكّام" من قبل سعّرها
تحسّب حسابه نجد واللي بها سكّان
وعان "العيينة" يسمع أمره "معَمَّرها"
وبعض العرب ظن العرب تعبد الأوثان
وقومٍ تجي ضده على الفور كفّرها
وبالفعل هذا زاد فأهل الطغى الطغيان
وبالفعل هذا عن مقاصدْه نفّرها
وجا راعي الهدلا"عريعر" وهو المزبان
وإذا صرّت العدوان هو فاتق صررها
هو اللي غزا "الدرعية" وهدّم السيسان
ولا تصمد السيسان لاجت "قنابرها"
وهواللي تواعد مع رجال من أهل"نجران
"وفكّ الله أقوامٍ نصاها وحاصرها
قبل مايجي خطّوا على الطّرس بالكتمان
مع"المكرمي" واستخلص القوم ماكرها
وبعد ما اكتفينا منهم وشامت العقبان
مشينا وعذاراها تمشّش عبايرها
وبوقته مناخ "العرمة" مشيّب الولدان
بوادي الجنوب تريد تشمل وحدّرها
وفي وقته بجيشه خذ "بريدة القصمان"
وبه ناس ياسرها وناسٍ يوسّرها
وجا"بطين ولد عريعر" ونازل العربان
وبعده "دجين" أخوه وأذكى منايرها
و"سعدون ولد عريعر"اللي كما الشيهان
ليا هدّ بالحاله دما القوم نثّرها
و"فالعتش"قوم"الوشم"و"سدير" مع ديقان
تلاحم"بن عريعر" مع القوم وأعثرها
و وصلت كبار الرّوس ماهيب فالذّرعان
والأبيات ما تحتاج قولٍ يفسّرها
وجيش "الخوالد" لاوطى مارجع خسران
وياكثر ناسٍ في ضحى الكون ناسرها
وفي "عيون الأحسا" جيشنا فرّق الخلاّن
وخلّى هل "الدرعيّة" تبكّي عترها
وقدّامنا اللي ترتجف منهم الأبدان
ومن قابل "الحكّام" صعبٍ يناورها
وفزعنا مع "جديع بن هذّال بن حبلان
"وناسٍ نجسّرها وناسٍ نسجّرها
وإذا حامت صقور السّما تقصر الغربان
كمنّ الصقور لها صقورٍ تصاقرها
وجا "دويحس بن عريعر" مروّع الأذهان
وبوقعة"سويقة"خاف خصمه وغادرها
بعد غادر الميدان خصمه وهو مشتان
وهوّن عن دروبٍ من أوّل تجاسرها
وسبب وقعة "غريميل" لأهل العقول يبان
ما فلّ الحديدة غير شيٍّ يناضرها
وهي خطّةٍ يقصد بها طيحة العمدان
ألا ما أخبث علوم الخديعة وما أقذرها
وجا أخوه "زيد" اللي كريمٍ كما الهتّان
والأوضاع مشحونة بشيٍّ ينغبرها
و"برّاك" بعده لاضرب يضرب النيشان
والأفعال يظهرها ولاهوب يضمرها
ولاهوب من قوم الردى والقشر خجلان
يعسف"الروافض"عسف ماشاف خطّرها
وعزالله أن حكمه بهذي الصّفة مزدان
وخل "الروافض" تستغيث "بجعافرها"
وعلى أرض"اللصافة"ناطح بجيشه"السبعان
"و"فالشّيط"أهل نجد العذيّة وفاطرها
وجا "ماجد بن عريعر" الفارس وسرعان
ماثوّر على العدوان حربه ودهورها
و"ماجد"مدحه القرم شيخ عنزة"مشعان
"بقيفان من جزل البحور ومن أغزرها
و"ماجد"مدحه الشاعر"جريس بن جلبان"
بعد ما قيوده ما لقت من يفزّرها
ونهار"السبيّة" مثل ما أنّا نعين نعان
وعدواننا في نصرها الشكّ ساورها
وجتنا القبايل سبع كنْها جيوش ألمان
طوابير تملا الشوف تحت أمر هتلرها
وصار اجتوال الخيل هو سيّد الميدان
ولا عاد يوحى إلا مهابد حوافرها
والأرواح والأرماح كنْها دلي وأشطان
وهذا يورّدها والآخر يصدّرها
وقلنا:ارحبي يالحرب كلّش ولا الإذعان
وموت المعزّة خير للّي يقدّرها
كذا العزّة العليا غريبة على الرّديان
وحنّا أهْلها يوم ان عدانا تقاصرها
وعجاج الرّمك طيّر كما ديمة و ودّان
وفي ساعةٍ عوّد حمرها كما أسمرها
عليهم تجمّعنا وكلْ زينٍ لهم شان
وأحطناهم سوات المعاصم وأساورها
ودنياك يا ابن آدم لها أشكال ولْها ألوان
ومن عاين أزينها فلا يامن أودرها
ومنّا الرّكب لامنّ ناطحته الرّكبان
ثبت وأعتلاها بإذن ربّي وبعثرها
سوات"العوارض"يوم جا خصمهم فرهان
ثلاثة رجالٍ قدْمها اللي يدثّرها
وصدّت عداها بضربٍ يواسي النّقيان
يالين ذلفت عنها العدا وقطْع دابرها
ومثل ماحصل في"مريخ"مع سربة "العجمان
"ولا به عصى إلا يخلق الله شاقرها
وجمعٍ من "المرّة" تحت شيْخة "جهيمان
"ذبح شيخه ولاهوب تالي خسايرها
ومقاماتنا معروفةٍ ما جهلها إنسان
رجالٍ تلحّق شوفها تطرح غترها
ومواقيف ربعي راسياتٍ مدى الأزمان
فياجاهل اعرفها وياناسي اذكرها
ليا النّصف راح أرباع والرّبع راح أثمان
حرار "الخوالد" ماتزحزح نوادرها
شديدين لو ناطى على الأمعز الصوّان
شظاياه تقدح يوم تشبح تطايرها
ويسير الجمل ماهمّته كثرة القردان
فعولٍ عرفها من يجاور مجاورها
ذكرت الملوك فكيف عاد أذكر الفرسان
يبا يتعب اللي راد بالشّعر يذكرها
كما "مدفّن الحيين" وإلا البطل"شامان"
أو القرم "ذبّاح" العرافه ومذعرها
أو اللي يقطّ الرّوس في ريع "أبا الجرفان
"وهو"جراش ابن شعلان" فالوشم بتّرها
وذي نقطةٍ من بحر للي لها ظميان
ولا أنا بعجز أسرد فالأقوال وأمسرها
ومن أوّل وإلى ذا الحين فينا من الأعيان
رجالٍ تعلّت ورفعتها محاضرها
وإذا عوّدت للشّعر حنّا هل الأوزان
لنا به قسم من خير الأقسام وأوفرها
كما"برغش"و"جبر بن سيّار" و"حميدان"
فحولٍ تجيب من أيسرالقاف وأعسرها
و"زيد الخشيم"وشاعرالكسب و الرّبحان
"مهنّا أبْوعنقا"اللي للأتراك كدّرها
وذي نبذةٍ عن سالف العصر والأوان
ولا أطنبت لأنّ الناس تعرف معاصرها
وإذا عوّدت للحرب حنّا هل الأكوان
ويا قلّ هيّة في ضحى الحرب نخسرها
وإذا عوّدت للعزّ ترا ما خالديٍّ هان
وإذا جت بوادر شرّ جينا نبادرها

[^نايف]

وإذا عوّدت للدين حنّا هل القرآن
وخير المساجد عارفتنا منابرها
إمام الحرم منّا وهو العالم اليقظان
ولا يُجْهَل "ابن حُميد" منْور دياجرها
و"حمود بن عقلا" للسفينة كما الربّان
سفينة فتاوى الدين في غبّة أبحرها
ولا أنسى"العمر ناصر"ولا مفتي الشيشان
يجاهد جهاد الحقّ والنفس ينذرها
"أبوعْمَر"سليل"السيف"راسي كما"ثهلان"
تشاورْه ربعه فالجهاد ويشاورها
ولا أنسى فَخَرْنا العالم المعتبر "سلمان
ابن عودة"اللي جرّة الحقّ يبصرها
مشايخ على روس "الخوالد" كما التيجان
وبه غيرها وأطلب من الله يكثّرها
وأنا مدْمنٍ حبّ القبيلة وأزيد إدمان
والإدمان ذا يحيي العرب ما يخدّرها
وأبفخر بربعي صبحٍ وليل ومسيّان
ماهي عنصريّة يوم أعدد عناصرها
لها أربع طعش ركنٍ ولا تفرق الأركان
وترا الدّار ماتثبت بليّا عوايرها
من أركانها "آل حُميد" وأكرم بهم شيخان
هم شيوخناوأرفع بهاالصوت وأجهرها
وركن "الجبور"إن صار سيف وقنا وعنان
عداها تجيها كسرةٍ ما أحْد يجبرها
وركن "الجناح" للابتي كنّه الجنحان
ولا حام حرٍّ دون جنحان يشهرها
ومن أركانها "دعومٍ" دعايم ظفرها متان
"دعومٍ" جميع القوم بالحيل تحذرها
وركن"السّحوب"ونعم ياسربة"السحبان
""سحوبٍ" تذيّر ما به أحْدٍ يذيّرها
ومن أركانها قومٍ بقاصي الزّمن والدّان
"شبلةٍ" نهار الكون ماعاش زاجرها
ومن أركانها اللي للقبيلة كما النيبان
"صبيحات"خاب اللي ضحى الكون شاجرها
وركن "العماير" فعلهم مايبي برهان
ما خابت قبيلة و"العماير" عمايرها
وركن "العمور" اللي ماتحتاج لأي أعوان
تضد الضديد وماتبي من يناصرها
ومن أركانها قومٍ لهم صولة وسفطان
"قرشةٍ" ياويل اللي تنوشه بواترها
ومن أركانها ركن "المطر" واثق البنيان
وبالموت الأحمر جملة عداه يمطرها
وركن "آل مقدام" الصناديد لامن حان
وغى هم ترا فرز الوغى هم كواسرها
ومن أركانها قومٍ لكفّتهم الرجحان
"مهاشير"تكسرخصمها لو طغى وأرها
ومن أركانها قومٍ نهار الوغى شجعان
"بني نهد" لاجا الهوش تدفر مدافرها
و"بني خالد" لْها عزّ ما جابه الخذلان
خَذَتْه بخناجرها ماهوب بحناجرها
ولامن تصاغر لابتي واحدٍ خبلان
فنجوم السما للّي مايدري يتصاغرها
قبيلة مهيلة راسية كنّها الضلعان
وإذا باحرت ما أحدٍ من القوم باحرها
هم"أهل السموت"وهم"كبارالبخوت"وصان
سيرها مع الأيام عزٍّ يعمّرها
ولو قمت أفاخر ما كفتني 100 ديوان
لَكَنَّ أختصرت القاف والله ميسّرها
أبرضي بها الراضي وأبزعل بها الزّعلان
وأبقهر بها اللي غرّ نفسه تكبّرها
وترا النّخلة العوجا ، ولو هي من البستان
رطبها يروّح ما انتفع منه باذرها
وترا الكامل الله والبشر طبعها النقصان
ويامال الشحم زلّة ولد عمّك استرها
ولاهمّني لو زوّد الغلّ فالحسدان
عساها تعذّب مع هواجس ضمايرها
ولابط كبدي غير فرّاقة الإخوان
ياليت الهروج العوج عنّا توفّرها
تعاف الرّطب وتدنّق تفتّش الحيضان
وتفرح وتملا من حشفها محافرها
وتولّف هل التوليف وتطمّر الجرفان
كُتبْ زين مظهرها لَكَنْ شين جوهرها
ومن هبّ وإلادبّ يكتب وبالمجّان
تجيه الكواغد والماتٍ محابرها
وشتّان بين أصابعك في يدك شتّان
ولاهو بطايل لو بغى الطّول خنصرها
ولايجحد الأفعال غير الرّدي الغلطان
وقبايل جزيرتنا مانجهل عشايرها
من السِّيف إلى السِّيف ومن طريف إلى جيزان
ومن "ربعها الخالي" ليا حدّ "عرعرها"
وكلٍّ له فعوله ولا للعرب حقران
على الطيب تخشرنا عليه ونخاشرها
وليس الفتى من قال: كانوا لنا جدّان
إذا كان مايتبع خطاها بحذافرها
وزمان الجهل ولّى وقفّى بلا رجعان
وصار الوطن شَجْرة طريّاتٍ أثمرها
وصرنا وقبايل نجد غصنٍِ من الأغصان
وعلاقاتنا بالدولة متان أواصرها
وكنّا أفقر أهل الأرض دنيا لكنْ سبحان
إلهٍ بنفط الأرض عوّد بنا أتجرها
وعسى الله يطوّل عمركم يا "بني مرخان
"على خدمة الأمة ورفعة تطوّرها
وألا وش تساوون ونساوي بدون إيمان
وكم دولةٍ يحفر لها القبر قيصرها
وعسى من يكيد لديننا ينحشر عميان
وكم حفرةٍ ماطبّها غير حافرها
وعسى الله يجنّب عن بطانتكم الخوّان
ويقرب لها ناسٍ سليمة بصايرها
وعفناك يادنيا الفنا اللي بلا ثبتان
تقلّب كما الأقداح في كفّ ياسرها
وترا العبد ماتنفعه كَنْزَتْه للذهبان
وحتى إيش لو كبرى القناطير قنطرها
وخذ لك عظة ياللي بدنياك ذي نشوان
تَعَيَّن عمايرها وعاين مقابرها
وترا العزّ فالتقوى وفالعلم والإحسان
ولافرق مابين أسمر الخلق وأشقرها
وعلى ويش يا اللي من ورا دنيتك لهفان
شوي وعظامك دابي الدود ينخرها
وترا العبد لامن طرح في داخل الأكفان
فلاتنفعه نفسه وزَمْرة تفاخرها
ودام ابن آدم مسلمٍ مخزي الشيطان
ونفسه ليا رادت خطى الشر يدحرها
فهذا الذي موعود جنّات ذات أفنان
وربّك ليا واعد مخاليقه أقررها
وعساني بهذا القاف فتّحت لي بيبان
لشعّار ربعي لأجل تُظْهر مشاعرها
أقوله وأنا ماناب في موقفي بحلان
وماكلّ شاعر لابغى القاف يصخرها
وبإمكان "ابن غشّام" زودٍ على ماكان
لَكَنْ بعض "الأشيا"بالخدارة مخدّرها
وترا الفضل كلّه لله الخالق الديّان
بدعت البيوت اللي ينومس تواترها
وتالي كلامي عدّ ما سالت الوديان
وعدد من لفى"مكّة" وطاف بمشاعرها
صلاتي على المختار ذروة بني "عدنان"
على المصطفى خير المخاليق وأطهرها

مع تحيات
أخوكم
نايف الجناحي

[ابن سويحه]

اللهم صلي وسلم على سيدنا محمد

وعز الله كفىىىىىىى وفىىىىىىىىى ابن غشام
لاهنت اخوي نايف على نقلك الرائع

[^نايف]

أخوي ابن سويحة

أشكر مرورك الكريم لا عدمتك يابن العم

[ابن سويحه]

لاهنت اخوي نايف وتم تثبيت القصيدة لااهميتها
تحياتي لك

[خيال العشاير]

السلام عليكم ورحمة الله وبركاته

والله ونعم بكم يابني خالد ، ولاحد ينكر تاريخكم المشرف سوى أحد اثنين ، إما جاهل يعذر بجهله ويعلَم وإما حاقد لا يلتفت لقوله لعدم مصداقيته .

[ابوصيره القاضي]

نايف بارك الله فيك
وصح لسان شاعرنا

[^نايف]

ابن سويحة
خيال العشاير
ابو صيرة

تشرفت بمروركم الكريم

وشكر خاص لمشرفنا ابن سويحة لتثبيته هذه الملحمة

[ابن سويحه]

يالربع انا كل ماشفت هالملحمة لزوم اقراها وادعي بالخير لشاعرها
ومن نقلها

[السرحي]

بسم الله الرحمن الرحيم

قصيدة الجناحي قصيده جزله بلا شك وقويه في نفس الوقت

تحياتي للجميع

[إبن الشمال]

http://www.sadym.com/pic/zakrafa13.gif




http://www.sadym.com/pic/bism.gif

السلام عليكم ورحمة الله وبركاته


http://www.sadym.com/pic/pereyng2.jpg


القصيدة من ديــوان
الــعــــــريـفــــي
نظم الشاعر :
" إبراهيم بن سعد العريفي الخالدي "

وما اختار من أشعار الشعراء القدامى لأجل كثرة
ما فيها من الحكم والأمثال


الجزء الثالث

الباب الأول
قصيدة بني خالد




ذكرت هبس ودق بالقلب دقاق
قصيدة قلتها في بني خالد مع العلم أن بني خالد متشتتين في البلدان وأكثرهم متحضرين ولا أعرف منهم إلا القليل وقد حاولت أن أزداد منهم معرفة ولكن هذا قدر الاستطاعة أرجو من الجميع عدم المؤاخذة إن زليت أو أخطيت أو زدت أو نقصت وإن كان فيه خطأ فأكثره من الرواة ولا أبرئ نفسي حيث أن الإنسان محل الزلل ولا قصدي أفضل بني خالد على غيرهم . وكل القبائل آخذين نصيبهم من الطيب والجود والمعرفة ولا مدحت من بني خالد إلا فئة إلا وأستثني القبائل التي تسكن أو تقطن مع بني خالد في وطن واحد من الحاضرة أو البادية أرجو عدم المؤاخذة . قالها : إبراهيم بن سعد العريفي الخالدي.


القصيدة تتبع.....

http://www.sadym.com/pic/zakrafa13.gif

[إبن الشمال]

http://www.sadym.com/pic/zakrafa13.gif


أهلا هلا ما هل همال الأمطار = وما غنت الورقا على دوح الأشجار
سلام أحلى من لبن شمّخ النيب = وانوج من المسك العبق عند عطار
لاهل الثنا والمجد والجود نهديه = وبازكى التحية لاهل الطيب نثنيه
ونختار شغموم هميم يوديه = من فوق ما يطوي تخاتيخ الاقفار
هافٍ مديل الأربعة والثمانين = توه جديد نظرته تعجب العين
كن حس صوته بالشكامين الاثنين = نفّاث ميراجٍ تحداه طيار
يا طارشٍ مني ترحل ونيته = متفقد هزله وجزله وزيته
النار والآيل الى من وطيته= يغرابه الراكب الى جامع القار
سنّد وحدّر عم لي وادي العرض= بازكى سلامٍ يشمل الطول والعرض
سلام مني لاهل المنطقة فرض= عموم وخصوص لاهل فرعة الدار
خص الخوالد بالسلام النظيفي = ربعي سلالة هبس نسل العريفي
ربع الهدا ضد العدا والحفيفي = رجالهم وقت المواجيب صبار
اسم وسلملي على نسل عرفان = بذالة المعروف في كل ميدان
لطامه العايل وذباحه الضان = ولهم بعال المجد قالات واذكار
وعلى الجبارا ساكنين الجفاره= اهل السخا واهل الكرم والخياره
ارجالهم بالهوش مثل النماره = الى زما العايل وزامن الامرار
وافين بالسمعه وبالفخر والطيب = والفعل باكرام الضيوف الاجانيب
نعمٍ الى ضيفوا وصاروا معازيب = ونعم يكرر بالمجالس والاخبار
وسلم على نسل الجناحي وجبور = هل السخى ذباحة الحيل والخور
والعوشني وال الجميعي لهم دور = وافين في كل المعاني والاشبار
حازوا على طيب المعاني والأخلاق = وعلى الشهامه باخذ عهد وميثاق
والراية البيضا مع كل مطراق = وقولة هلا باللي لفا والذي زار
من غير قاصر في قبايل بني زيد = شيبانهم مع مكرمين الاواليد
نعمٍ بهم لا ما نتخوا بالبواريد = والمعركة دخانها حاميٍ حار
أهل الكرم وأهل الركاب المواجيف = هل المروره والسخاء مدهل الضيف
من مثلهم ما ينذكر عنه تعريف = تاريخهم في قمة المجد والكار
ومن غير قاصر في عتيبه وقحطان = اربوعنا باحقاب ماضية الازمان
لشتدت الهيجا بداين وديان = نعم الى عج الرمك والدخن ثار
من قصر مزعل ترتحل فوق موجاف = حدر وإلى جيت البطين اقهر الهاف
سلم على آل زياد من بد الاسلاف = وبني غنيم اللي غيابٍ وحضار
سم على ال زياد واثن السلامي = اهل الشجاعة والرجال الكرامي
رجالهم مثل النداوي القطامي = نعمٍ يكرر للمشاكيل الاخيار
وسلم على ال غنيم ريف المواجيف = أهل الشجاعة والكرم مدهل الضيف
ضد الخصيم وللمسير كما الريف = واثني السلام وكرره لال سيار
اهل السخا نطاحة الموجباتي = قولٍ على وضح النقا بالثباتي
كسابة المعروف والطايلاتي = الكل مدهالٍ لضيفٍ وخطار
غلمة شغاميم الدعوم المشاكيل = خالد ازحول الرجاجيل
للضيف ريفٍ تذبح الخور والحيل = وللضد من صنعة هل الهند بتار
أهل الكرم وأهل الشجاعة على القوم = وتاريخهم كلٍ فهم عنه معلوم
أولاد ابن سيار عاديهم اللوم = ابيوتهم غيفٍ وريف المن زار
من غير قاصر في رجال الحماده = اللي لهم في قمة المجد عاده
رجالهم ما هوب يبخل بزاده = ولهم فعول في مواقيف الاخطار
حدر على العارض وملفاك الاجواد = اهل المروه والكرم سقم الاضداد
مقدم بني خالد شغاميم الأولاد = بني عريعر ماكر الجود والكار
في وقتهم وبن عريعر هو الشيخ = ورماحهم تفتك سوات الصواريخ
ولهم على هذا شهودٍ وتاريخ = ودارت دواليب الدواير بالاقدار
واليوم في عزٍ ومجد وكرامه = ومتمسكين في دروب الشهامه
ولا حصّل الرجال غاية مرامه = ادرك بها مجدٍ كما ظلع سنجار
وسلم وكرر للرجال الحلاحيل = سلامٍ احلا من قراح الشهاليل
واثن التحية للشيوخ ال منديل = أهل الكرم والجود للضيف والجار
ذباحة الحايل بوقت الكرامه = ولطامة العايل بوقت القوامه
وفي وقتهم هم من ارجال الزعامه = ماكر حرار عاليٍ فوق الاوكار
سلم على الشدى عزيز القبيلة = وال شقري من نسل هبس الاصيلة
أهل الكرم وأهل العلوم الجميلة = ينبيك عن ذكر المشاكيل الاخبار
من غير قاصر في المشاكيل الاجواد = سلة هل العوجا شغاميم الاولاد
ال سعود مطوعة عاص الاضداد = مرويّة عطش العدا كاس الاكدار
احما الحمى بالحال والمال والسيف = والراي والحكمة وحسن التصاريف
لين امّنوا جمله جميع الأطاريف = عن كل محتال وحاقد ومكار
وبالخرج من هبس العزيزه حمايل = اهل الكرم واهل الوفا والجمايل
نعمٍ إلى عدوا ارجال القبايل = ونعم بهبس عموم في كل الاقطار
باربوعه اكرام الرجال ال غملاس = اهل الشجاعة والشهامة ونوماس
أهل الكرم والدين مرفوعة الراس = الكل ميدان السخا واخذة الثار
غملاس هم ساس الكرم واهل الجود = وهزاع وال سعال من ماكر الفود
يوم الوغا لشتب نار وبارود = يردون ميراد الظوامي على النار
من غير قاصر في هل الخرج الاجواد = نعم الى جأ هاتش الضيف رواد
واهل الظفر واهل الكرم واهل الامجاد = بيوم اللقا تفدا وتصخى بالأعمار
واهل الشجاعة والكرم واهل الدين = اللي ربوا باربوع دار الهزازين
ال الرزوق اللي حشام وغالين = باربى الحريق ديار وافين الاشبار
دار السخا ديرة اعزاز القبايل = دار الوفا ديرة صناديد وايل
دار الظفر واهل المهار الاصايل = دار الهزازين المشاكيل الاخيار
من غير قاصر في الرجال الوفية = اهل الكرم واهل الفخر والحميه
اهل الحريف اورود حوض المنيه = لشتبت الهيجا وملح القهر ثار
بنعام والحلوه اولاد العقيلي = بيوم القوامه مزبنين الدخيلي
اهل الجفان اللي تغطا بحيلي = للضيف مصحوبة بحشمة ومقدار
اهل الكرم واهل الشجاعه والافعال = وللجود والواجب ايضحون بالمال
معربين الجد والعم والخال= نعم يكرر عد من بالقدم سار
نعمٍ هل الحلوه ومن كان غايب = عن الوطن من كل صبيٍ وشايب
نعمٍ عدد وبل المطر والهبايب = نعمٍ بهبس ومن نزل حومة الدار
من غير قاصر في وطنهم وهاليه = رجالهم صطر الظفر والكرم فيه
الكل منهم بالقدا دون عانيه = ريف الضعيف ومدهل الجار والمار
اهل الشرف واهل الشجاعة والامجاد = غلمة تميم مطوعة عاص الاضداد
اهل الكرم بالخور والحيل والزاد = ريف الوطن وحماة عن عبث الاشرار
وحريملا فيها ارجال ال جماز = اهل الكرم ربع شريفين وعزاز
وفيها ابن مشعل بالكرم والثنا فاز = ربع كرمهم مثل صفاق الابحار
وبني ابراهيم المداغيش الاحباب = سلة بني خالد عزيزين الانساب
اولاد هبس أهل الكرم حصن الاطلاب = أهل الشهامه بالوغا تهدي الأعمار
نعمٍ بهم ل ما لفا الضيف جيعان = ايقلطون اظهور حيل وخرفان
ولا يحسبون الخسارة والاثمان = كن الخساره عندهم عشر دينار
وبالبره ال مجاهد يلهون بالضيف = منصا لاهل عوص الركاب المواجيف
سعد الرفيق وللمسير كما الريف = وبالخوف لربوع الوطن سور وحظار
من غير قاصر في ارجال الشجاعة = اهل الكرم واهل المروه وطاعه
سكانة البره وكل الجماعة = وبالدين تباع الصحابة والانصار
وفي محمل العارض لنا ربع ورجال = بذاله المعروف مرخصة الاموال
أهل السخا وأهل الشجاعة والأفعال = نعمٍ بني خالد سند كل محتار
استثني ارجال الوفى والشكاله = اهل الكرم والجود في كل حالة
اهل الظفر وهل السخا والجماله = نعمٍ هل المحمل على كل مضمار
اسم وبلغ بالسلام ال ابو ذيب = اهل الحزم والعزم واللزم والطيب
ريف الرفيق وللمسير معازيب = نعمٍ بني خالد الى ذكرهم دار
نعمٍ بهم والنعم باهل الصّفرّه = رجالهم بالهوش لله دره
نعم يكرر للجميع الف مره = وببن اصقيه الشهم بيطار الاشعار
بشقراء عريبين القبايل والانساب = اللي على درب المواجيب دراب
آل السبيعي وال فاضل لنا اقراب = هم بحقل الطيب مارد ومصدار
من غير قاصر في بني زيد الاجواد = بذالة المعروف مرغمة الاضداد
اهل المروّه والسخا ضد الالحاد = والهُم بعالي قمة المجد اطوار
وبن بليهد ماكر الجود والطيب = شيخٍ وينصونه اطروش الاجانيب
منصاً وملفاً لاهل الفطر الشيب = بالسلم بذالٍ وبالحرب مغوار
في ما مضا عدٍ قراحٍ كما الريف = وغيثٍ على وافد جميع الاطاريف
وذكرٍ عن اهل الدار بالجود تعريف = اهل القراين جودهم سر واجهار
واهل القصب دار الشويعر حميدان = اهل الكرم ومطوعة كل ديقان
نعمٍ بهم وأيضاّ النعم بال شعلان = اللي لهم قولة نعم حرز واشعار
الى لفيت الوشم بارفع بالندا = لاهل الشهامة والكرم بحر الندا
قل نعم يالحامد الى ماله مدا = رجالكم يا هبس من نسل الاخيار
أفعالكم مع درب مطراق القدا = والى زما العايل فهم ضد العدا
مستثنينٍ سكان بلدة ثرمدا = وجيرانهم واللي سكن حومة الدار
دار المكارم والشجاعة والأمجاد = دار السخا دار الكرم دار الاجواد
دار العناقر في وغار الحرب وراد = وبالسلم غيث لا لفا الدار زوار
وبالمجمعه وجلاجل اهل الخياره = وبن عطالله مسكنه بالقواره
وبعشيره اسود العرين النماره = وراعي الحصون ابن تميم ابن الاخيار
نعمٍ الى عدوا ارجال القبايل = نعمٍ بني خالد بوقت الصمايل
واهل وطنهم من جميع الحمايل = واهل سدير اللي تفادي بالاعمار
وحوطة سدير ابها الجراوا المشاكيل = اهل الكرم بصحونهم والمعاميل
لطامة العايل الى شافوا الميل = ومن الشرف والمجد غنيا وتجار
من غير قاصر في هل الحوطه اعموم = اهل الشرف واهل الشجاعة على القوم
دون الوطن حصنٍ منيعٍ ومزموم = حريبهم لا واجه الحصن ينهار
وابالزلفي ال حميد وبه ال حمدان = اهل الكرم والجود نقالة الزان
نعم الجميع برفق حامين الاوطان = دارٍ بها اولاد الجريسي لها اسوار
الكل منهم له ابحر الكرم جود = وكلٍ ايحاول يطلب المجد والزود
ولا جا نهارٍ فيه نارٍ وبارود = ما حسّبوا للعمر مربح ومخسار
والغاط فيه من ال حيدر جماعه = وفيه ال رزق اهل الكرم والسناعه
نعمٍ بني خالد ارجال الشجاعه = علّ الوطن يسقى من الوبل مدرار
دار الرخا ديرة اعزاز القبيلة = دار السدارا اهل العلوم الجميله
اهل الكرم واهل السيوف الصقيله = علّ الوطن غيثٍ هنيٍ ومبدار
واهل عنيزه من تسما الجناحي = نطاحة الكايد اطيور الفلاحي
فازوا بموفور الثنا والمداحي = ويروون حد السيف لشتبت النار
من غير قاصر في عنيزه واهلها = نعمٍ بدار العز واللي نزلها
وحامل تكاليف البلاد وجملها = ابن سليم ابو سليم ابنها البار
وبالعوشزيه والقصيم المطاريد = وببريده الربدي نفاد المصاريد
نعم الى عدوا قروم الاواليد = وشتبت الهيجا وعج الرمك ثار
اهل الكرم واهل الظفر واهل الجود= سلمٍ لهم ورثوه من سالف جدود
ملبوسهم بالحرب من صنع داوود= اوقت الرخا تاج الشرف حرز وشعار
وبن ثويني الشهم حلاّل الانشاب = ملفا ومدهال الرفاقه والاجناب
راعي الشجاعة والكرم واف الانساب = زيزوم ربع ما يهابون الاخطار
واهل الشهامة والكرم فخر الاوطان = سعد الرفيق الخيرين الطويان
في حومة الهيجا ابطال وشجعان = ومجنى حرار من لحاليح سنجار
نعمٍ بهم لا شافت العين للعين = بوقت الكرم وإلاّ بوقت الاكاوين
ومكارم الاخلاق والعقل والدين = ويثنالهم في محتوى الهرج لادار
ونسل الجناحي من قبايل بريده = نعمٍ بهم يوم السنين الشديدة
من الشرف بقّوا حصون مشيده = واحفادهم دون الوطن سور وستار
استثنى اهل الدار من كل الأجناس = اهل الكرم والجود مع قوة الباس
اهل بريدة في وغا الحرب فرّاس = وبالسلم در اللي تفلي بالاقفار
وتفخر قصيبا بالشيوخ المهنا = اهل الشرف واهل الشقير المحنّا
وبالشقة العقلا على ما تمنا = اهل الدلال اللي بها البن وبهار
استثني قصيبا بأهلها المسمّين = اهل الشجاعة والكرم واهل الدين
وبالشقة ارجالٍ كرامٍ عزيزين = للشرع تباعٍ وللدين انصار
وهل الصباخ وربعةٍ بالبدايع = نعمٍ بهم والنعم باولاد شايع
اهل الكرم ريفٍ على كل جايع = والضيف يلقى عندهم بن وكتار
ومن هبس بالمذنب ارجاب ال حوّاس = اهل الكرم في حومة الحرب فرّاس
كم حصّلوا بالمجد فخرٍ ونوماس = وكم بطلوا من كيد حاسد ومكّار
استثني ارجال الصباخ المشاكيل= واهل البدايع من ازحول الرجاجيل
ونعمٍ هل المذنب ارجالٍ حلاحيل = نعم الجميع إلى غدا الملح معصار
وبالبصر شجعان الرجال المحيميد = الطيبين الاكرمين الاجاويد
شيبانهم مع مكرمين الاجاويد = من الوفى والمجد غنيا وتجار
فخر الوطن غيث الوطن للوطن ريف = ومسكانهم دايم حدود الاطاريف
متطرفين لاجل ينصاهم الضيف = وحمى وطنهم عن مغامر ومكار
اهل الكرم والجود واهل الشجاعه = وهل الفخر واهل الوفى والبتاعه
ومنهاجهم للدين سمعٍ وطاعه = ومن الرجال اللي تسمى بالاخيار
نعمٍ بهبس ومن سكن في جواره= من القبايل باديه والحضاره
علَّ الحيا يسقي روابي دياره = وتزمي فياضة بالشمطري ونوّار
واهل حنيضل حصّلوا كسب الامداح= حياتهم في ما مضى عز وافراح
نعمٍ بهم يوم الثميدي والاملاح = مثل الغمام وجمعهم للعدا سار
يروون حد اللي شباته شطيره = والدم شلالٍ سوات المطيره
وكم فرقوا بين العشير وعشيره = من خفرةٍ في زوجها تطلب الثار
استثني ارجال الوفى اهل الاسياح = المجد لابطال الوطن حرز ووشاح
اهل السخا دون الوطن سور واسلاح = وينبيك عن فعل المشاكيل الاذكار
والرس فيه الخالدي ابن بلاّع = وافٍ الخصايل زاكي الجد والباع
للشرع مطواعٍ وللحرب مرجاع = وفعله وتاريخه للاحفاد تذكار
من غير قاصر في هل الرس من يام = أهل الوطن وخلوطهم عبر الاعوام
اهل الحزم والعزم واللزم وولام = إلى زمت نار العدا والفلك دار
وبربوع حال نفتخر بال ضبعان = لطّامة العايل وذبّاحة الضان
ولهم على هذا شهودٍ وبرهان = ويردون بالهيجا على قب الامهار
ومن هبس نفخر بالشويعر بحايل = فعله ومجهوده على كل طايل
جوده من جدود العصور الاوايل = ابنا الحكيم اللي للاشعار بيطار
وفيه العواصا اهل الكرم نسل الابطال = اهل الشهامة في وغا الحرب عيّال
ريف الرفيق وللعدا مثل الاشبال = في حومة الهيجا يدوسون الاخطار
قد جالهم وقت الثنا والفخر دور = اوقت الشجاعة جالهم فعل وعصور
نعمٍ يكرر كبر ابانات والطور = يا احفاد شيخٍ له تواريخ واخبار

http://www.sadym.com/pic/zakrafa13.gif

القصيدة تتبع .......

[إبن الشمال]

http://www.sadym.com/pic/zakrafa13.gif


استثني ارجال الشمال السناعيس = حمّاية اربوع الجبل بالملابيس
هدّامة احصون العدا والمتاريس = اهل الشجاعة لا تعامسن الاشوار
واهل قفار اللي لهم بالكرم صيت = سلة بني خالد شيوخٍ عناتيت
رجّالهم لا مالفا قيل حيّيت = بصوتٍ رفيع ونال فخرٍ ومقدار
الهُم بعال المجد فخر وكرامه = ومتمسكين بالوفى والشهامة
وابهم الى زار المسيّر علامه = نهض الحجاج ويا هلا بالذي زار
استثني اهل الدار من كل الاجناس = اهل قفار اللي لهم رفعة الراس
اهل الكرم والجود مع قوة الباس = اوّقت اللقا يردون ما ارعوا للاشوار
واهل سكاكا شيدوا صرح الامجاد = افعالهم يوم الوغا فوق الاشهاد
نعمٍ بني خالد على الحرو ورّاد = وبالجود في وقت الكرم مثل الامطار
وافين في كل المعاني والاخلاق = وتاريخهم يشكر مع كل مطراق
منيحةٍ من عند خلاّق الاطباق = رب السما والي الملا النافع الضار
فيهم اخصال من المزايا الحميده = وشوفاتهم صوب المعالي بعيده
من بينهم وصل وحياةٍ سعيده = خص الضويحي وال علي نسل الاخيار
نسل القريشي متعبين المعاميل = طبع لهم من عصر جيلٍ بعد جيل
أنا اشهد انهم من خيار الرجاجيل = ويحضون باشعار الفخر سر واجهار
أهل الفخر وأهل الكرم واهل الاخلاق = واهل الشجاعة لازما الجمع وانساق
افعالهم يطرب لها كل مشتاق = نعمٍ بني خالد عزيزين الاذكار
نعمٍ هل الطوله شغاميم الاولاد = عز الوطن فخر الوطن صرح الامجاد
نعم الضويحي وال علي نسل الاجواد = درعٍ حصين دون حلوات الاثمار
يشهد لهم ضرب القنا (والمناويخ) = وضرب المشوّك بالوغا والتواريخ
نعم الجميع الابن والاب والشيخ = وقت اللقا فيهم صعاطير وصطار
عبد الله الكايد زعيم العشيره = وابناه من بعده بقوله اذخيره
نعم الخلف بأهل العقول الكبيره = يا قاهم الله من عواثير الاشرار
اكبارٍ فعايلهم على كفح الاضداد = وكبر الصحون اللي بها الحيل والزاد
أهل الشجاعة والكرم واهل الامجاد = نعم الجميع مكررٍ لبو بشار
وعبيد من بعده وسيع البنايد = شيخ العشيره للمواجيب زايد
شيخٍ ولد شيخ الكرام آل كايد = له سمعةٍ عند القبايل ومقدار
ومفلح عضيد عبيد بالفعل والقول = بوقت الكرم والجود ما هوب مجهول
ما قيل فيه من الكرم قيل معقول = وسعيد ومساعد سند كل محتار
وقت الكرامه مثل وبل المخيله = اوقت الشجاعة من ارجالٍ اصيله
متسلسلينٍ من عزاز القبيله = من أسرة الكايد عزيزين الاذكار
والشهم ابن غانم اديبٍ وراوي = ومن الشرف والجود والمجد حاوي
اجاره الله من جميع البلاوي = حيثه من الربع المشاهير الاخيار
شاعر ومشهورٍ ابّدع المثايل = ومغيَّبٍ جملة قصيد القبايل
ملاحمٍ من كل قيلٍ وقايل = صعبات وطوالٍ كليفات واعسار
نعمٍ يابو فيصل الى حل طاريه = كل المزايا الطيبه والفخر فيه
ودّك الى جات التعاليل توحيه = يلقى المثايل من حسينات الاشعار
ونعمٍ بابن عقلا حسين القصايد = اللي قصيده دايمٍ به فوايد
قوله حسينٍ مثل زين الموايد = مشكّلٍ من كل ما كان تختار
يا راعي الهاف الحمر مر نواف = سلم عليه اعداد ما هل هتاف
واثن السلام وكرر اميات وآلاف = سلامٍ احلى من لبن كل مدرار
سلام مشتاقٍ عليهم أوّلهان = لنواف مقري الضيف من قرِّح الضان
الخالدي الأصل سلة اذوبيان = اللي يشوش إلي لفا زاير الدار
وانص آل مسعر خصّهم بالسلامي = اهل الوفا نسل الرجال الكرامي
وللثلج وآل الثلج بازكى احترامي = وازكى سلامٍ عد من بالقدم سار
رجّالهم ما ينذكر عنه تعريف = معروف في جملة جميع الاطاريف
بقولة هلا لا مالفا الجار والضيف = ونهض الحجاج ومرحبا به ومقدار
فايض كرمهم حاتمي غير الاخلاق = واخلاقهم شهد النحل عذب الاذواق
منيحةٍ من عند خلاق الاطباق = اللي إلى منّه عطا يعطي اكبار
النعم يال الدرع يا كرام الاشناب = ونعم السحيم اهل الشهامة والاداب
تحيةٍ تقرا المسنين والشاب = عموم وخصوصٍ لوافين الاشبار
يال الجناح اهل الشهامة والافعال = يا معربين الجد والعم والخال
افعالكم يشهد بها فوق الاقذال = افعال خير وحشمة الضيف والجار
وافعالكم يوم الدخن كنه السيب = دون الوطن والناعمات المهاديب
وعفوٍ حماكم عن جميع الاجانيب = دونها اشبالٍ بين فارس ومغوار
يا هبس يا فخر السموّه والانساب = ياللي على فعل المواجيب درّاب
يا هل السخى والجود يا حصن الاطلاب = نفخر بذكراكم مع طيب الاذكار
يا راعي الميمون يالحر القطام = اسلم وسلّم واثنلي رد السلام
على آل مطر نسل الشغاميم الكرام = اولاد هبس اهل الشرف واهل الوقار
الدندني وايضاً الشمردل يا هلا = وايضاً الغطيغط يا هلا يا مسهلا
تاريخهم معروف مع كل الملا = هداتهم مصحوبةٍ بالانتصار
سلم على صقر الصقور الدندني = اللي عن التعريف باذكاره غني
شيخٍ نواله دايمٍ لذٍ هني = يستاهل التقدير والحشمة وكار
وايضا الشمردل والغطيغط بالمجال = نعمٍ يكرر للشغاميم الرجال
ذبّاحة الاكباش متعبة الدلال = بيوم الوغا يصخون غالية العمار
أهل الشهامة والكرامة والعلا = اهل الشجاعة والوفى وأهل هلا
تستاهلون النعم كله والغلا = يا طيور شلوى وكر مدهال الحرار
من غير قاصر في سكاسكا واهلها = من كان يسكن في البلاد وطللها
نعمٍ بحاضرهم ونعمٍ باولها = وكرر لهم من صادق النعم مكثار
من غير قاصر في بقية هل الجوف = اهل الكرم درع الوطن حزة الخوف
نعمٍ بهم لا جوك طوفٍ ورا طوف = واشتدّت الهيجا وصار الذي صار
يا راعي الهاف الحمر ود الاعلام = ملفا ومدهال الضيوف ابن غشام
من ربعة الفيصل عزيزين واحشام = رجالهم مثل النداوي الى طار
الى كفخ وادلا يعوق الضريبه = وهوماتهم بين القبائل تعيبه
يزكون دايم بالدروب الصعيبة = وحريبهم ماله على الغلب مقدار
ساس الكرم ساس الوفى والشجاعه = ساس السخا ساس الفخر والبتاعه
ساس المروّه والادب والسناعه = اهل المزايا الطيبة حصن الاخطار
مستثنين قريه باهلها المسمّين = اسلالة الدوشان ربعٍ عزيزين
اهل الشجاعة والكرم بالميادين = اهل الشهامة ندر وافين الاشبار
ومطير ماعون الكرم سقم الاضداد = اهل السخا والجود فدعان الاولاد
نعم الجميع الى طغا الملح ونقاد = وعجّ الرمك غطا السما والقهر ثار
وال المزيني ماكر الطيب والجود = ورثوه من أبٍ ومن سالف جدود
نعمٍ بهم عدة ذرى ذارى النود = غلمة بني خالد عزيزين الاذكار
عميدهم عمدة وسيد ابلاده = غيث الرفيق ومن يريد السعادة
بقولة هلا يا مرحبا رسم عاده = بعد كرامتهم على كيف واكتار
يا راعي الميمون يا خير مرسال = يا زاكي الجدان والعم والخال
خلك على الداعي اوسع لنا البال = نبيك تاخذ يمّة الشرق مشوار
حدّر وقد الراحلة يمّه السيف = ديرة بني خالد حماة الاطاريف
في وقتهم من غير مدحٍ وتعريف = تاريخهم بالكتب سجل بالامصار
اهل الخليج اللي لهم بالخفر طور = شعب العماير والمهاشير واعمور
ومقدام واولاد الجناحي وجبور = اللي يدوسون المعارك بالاخطار
وللخالدي جملة سلامٍ ومقدور = هبس الذي بالفخر والجود مشهور
مقدمهم آل حميد ذبّاحة الخور = ولهم امجاد فوق ممتد الانظار
سلّم على جملة شيوخ العماير = خص آل خالد حاملين الخساير
وعلى آل حسن مقدم عزاز العشاير = وعلى آل مجدل بالكرم مثل الانهار
الكل منهم يكرم الجار والضيف = وسقم العدا من فوق عوج المحاريف
ضد الضديد وللرفاقه كما الريف = وغيثٍ كما همّال الانوا على الدار
وسلّم على ساس السخا منقع الطيب = ابو فهد من نسل حصن الاطاليب
الشيخ ابن فزّاع مقري الاجانيب = اللي يشوش إلى لفا البيت خطّار
ساس السخا ساس الكرم صرح الامجاد = ساس الشهامة من شغاميم الاولاد
مستارثٍ الطيب من ماضٍ الاجداد = وبنا واشاد المجد من عشرة ادوار
قل هكذا السيره تبي حسن الاخلاق = وبذلٍ كما مدرار الامطار دفّاق
مثل ابن مجدل شبه حرٍ الى تاق = ل قيل بالمجلس ضيوفٍ وزوار
سلّم على آل صبيح نقّالة الزان = أهل الشهامة والكرم دب الازمان
عجران والهدهود وايضاً آل شعلان = نعم الجميع امن المشاكيل الاخيار
وبني زبن رمز الفخر والشهامة = اهل الشرف واهل الوفى والكرامه
واهل الشجاعة يوم وقت القوامه = يشهد لهم بافعالهم سر وجهار
وثواب وظهيرات وايضاً آل حيّة = اهل الشجاعة والكرم والحميّه
حمّالة الكايد اجمال الرزيّه = ريف الرفيق وللعدا حامي النار
سلّم على آل دعيج وشريش ورماح = وبني مسلّم منقع الطيب وبداح
أهل الشجاعة والكرم واهل الامداح = نعمٍ بني خالد هل المجد والكار
من الحساء لين العرق العذيّة = والشام والاردن ونجد المريّه
نفخر بهبس وكلمة الخالديّة = ويالايمي في ربعتي منك معذار
وربوعنا اللي تكرم الضيف والجار = هبس العزيزين المداغيش الاخيار
فجري وعفراوي هل المجد والكار = بيوم الملاقا ما تحسب للاخطار
اللي على كسب المراجل دواريب = ويافون في جملة جميع المواجيب
نعمٍ هل الطولات حصن الاطاليب = سقم الحريب إلى التقى الملح والنار
للضيف ريف في جميع المواجيب = وللضد مصقولٍ عطيب الاصاويب
وللجار حصن وللمسيّر معازيب = وللملتجي سورٍ عن الضد واحضار
أهل الكرم واهل السخا والتعاليل = أهل الشجاعة متعبين المعاميل
ذبّاحة الخرفان والخور والحيل = وعلى العدو يكوون قلبه بمسمار
واهل الكويت الطيبين النشاما = اهل الشجاعة والرجال الكراما
اهل الوفى نسل الجبور الخطاما = اهل الكرم والجود وافين الاذكار
اهل الجفان اللي يهلون بالضيف = ودايم مجالسهم المن زارهم ريف
ما يسكنون الاّ حدود الاطاريف = على الطريق الدرب ناهج ومرّار
وبالادن شيوخٍ كرامٍ عزيزين = آل العطين اللي حشامٍ وغالين
فلاحٍ مقدمهم بوقت الاكاوين = اوقت الكرم والجود ودروب الاخطار
اهل الشّيم واهل الكرم والشجاعة = واهل المضيف بوقت عصر المجاعه
وحلاّلة الاشكال بين الجماعة = نعمٍ بني خالد عزيزين الاذكار
نعمٍ بني خالد عزاز القبايل = نعمٍ بني خالد بوقت الصمايل
اهل الوفى واهل المهار الاصايل = رجّالهم مثل النداوي الى طار
واتباعهم من هبس وافين الانساب = اللي على درب المواجيب درّاب
اهل السخى ومطوّعة عاص الاصعاب = حريبهم لاشتدت الحرب ينهار
من غير قاصر في الرفاقه والاصحاب = واهل وطنهم من مسنين واشباب
ومن كان يسكن بالوطن بالف ترحاب = تحيةٍ للكل قدرٍ وتذكار
وبالاردن القاضي عزيز القبايل = اولاد هبس اهل المهار الاصايل
اللي لهم وقت الملاقا فعايل = ما بين شجعانٍ وفارس ومغوار
عم الخوالد بالسلام المكرر = اعذب من الترياق واحلى من الدر
وانوج من الورد القطيف المعطّر = وقولة نعم بأهل الشهامه هل الكار
وبالشام من صلب الخوالد قبايل = اهل الشهامه والوفى والجمايل
منها البُوش وافين كل الخصايل = سقم الحريب وحصن خايف ومحتار
مقدم شغاميم الرجال المشاهير = اهل الثنا والنعم بين الجماهير
واتباعهم ندر الرجال المناعير = اللي لهم في حمص مدهال واديار
وبني ودي اهل الكرم والشهامة = ساس السخا رمز الوفى والكرامه
بوجيههم وقت الملاقا ابتسامه = ونهض الحجاج لمن نواهم بمسيار
ورا الشفا والبعد جانا خبرهم = ومن زار هجْر من القبيلة ذكرهم
بالسمعة العليا بغالي ديرهم = وتاريخهم سجَّل بصفحات الاخبار
اهلاً هلا ترحيبةٍ كلها ودّ = بوفد العوارض زاكي الخال والجدّ
سلة بني خالد هل الاصل والعدّ = سجِّل لهم في قمة المجد تذكار
لهم مع المطران قالات واعهود = ومع الخوالد دار واقطار وجدود
وفّوا بها الاطراف بالفعل والجود = وحسن التصرف والوفى وأخذة الثار
قد جالهم علمٍ وفعلٍ وتاريخ = نقوة اعيال كل منهم باسم شيخ
وحصل لهم وقت الملاقا مناويخ = مع حاكمٍ فادى وفادوا بالاعمار
من الصباح الى العشا واسمر الليل = والمعركة شبوبها الزِلم والخيل
وجمع العوارض ماخذينٍ تنافيل = اسلوم ماكن ثار حربٍ والاصار
باعوا ارواحٍ ما تقدر بالاثمان = على الولي رب السما قاضي الشان
اوقاهم الله ثم بأمات تيجان = وحموا ركايبهم بسبرات الاقطار
باقلوب صم مدرعات حديدي = وعزيمة تعطي البطل ما يريدي
ان مات دون حماه فهو شهيدي = وان عاش سجّل له توارخ واذكار
استثني اهل الدار مره وعجمان = ومطير واولاد الهواجر وعزمان
وسبيع واهل الدار حضرٍ وبدوان = اكبارهم واللي صغار وقصّار
مأقصد بمدحي للرفيق اتحدّا = ولا على حق العبارد أتعدّا
الكل في فضل المليك المفدّا = ننام وعيونه على الشعب سهّار
حامي الحمى من حد حقلٍ لجيزان = وما حدث الوافر شروره وظهران
الذيب مكفولٍ يفلي مع الضان = مستصغرٍ حقرٍ ولو كان مكّار
مقدم هل العوجا الى ذعذع النود = على العدا ما بين طارد ومطرود
ولا شبت الهيجا بنارٍ وبارود = حريبهم قلبه كما دقة الطار
اشبال سقم الضد صقر الجزيرة = عبد العزيز اللي حما كل ديره
سيفه شقيرٍ ما هوى في جفيره = حتى تبدّل بالرغا كل هدّار
استغفر الله عن زياده ونقصان = وعن كلمةٍ تكتب على غير برهان
وارجى السموحه كان بالقول غلطان = ولا كل من غاص البحر جاب محّار
ذكرت هبس ودق بالقلب دقّاق = وهز الضمير اذكار ربعي والاشواق
جبت القلامه والمحابر والاوراق = وديونت من فيض الحشا زين الاسطار
مني سلامٍ للشيوخ العناتيت = افخر بهبس الى توضح لي البيت
وسطرت من فيض الحشا ما توريت = سلامٍ اشهى من حلا در الابكار
سلامٍ انوج من عبير افخر الطيب = والذّ واحلى من ثمار المهاديب
منّي مكرر بالوله والتراحيب = لا احباب واقراب بني عم واخيار
سلام مشتاقٍ على شوف الاحباب = ربعي بني خالد عريبين الانساب
تحيةٍ تقرا المسنين والشاب = شيبانهم واللي حديثين الاعمار
هذا وصلى الله على صفوة الناس = ما هب هبّاب من النود نسناس
وعداد ما تذرا الهبايب بالاطعاس = وما غرّد الحادي على دوح الاشجار

http://www.sadym.com/pic/zakrafa13.gif

تمت القصيدة.

مع تحيات اخوكم :
إبن الشمال؛؛

[صقر الخوالد]

بسم الله الرحمن الرحيم
السلام عليكم ورحمة الله وبركاته
الى اخي ابن الشمال وفقه الله وجماعته اهل الجوف
عزالله ان الشاعر قال الصدق في قبيلة بني خالد
وابو سعد محبته لقبيلته مالها حدودوانتم من جماعته المذكورين بالطيب والكرم والعلوم الغانمة الله لايقطعنا منكم وجعلنا دائما متواصلين على المحبة والخير.
كما اشكر والدكم العزيز على دعمه لمنتدانا ولا فيه قصور لبني عمنا اهل الجوف.
بارك الله فيك يابن عمي وجعلك واهلك ذخر لجماعتكم.


محبكم صقر الخوالد

[ابن سويحه]

الرسالة الأصلية كتبت بواسطة صقر الخوالد
بسم الله الرحمن الرحيم
السلام عليكم ورحمة الله وبركاته
الى اخي ابن الشمال وفقه الله وجماعته اهل الجوف
عزالله ان الشاعر قال الصدق في قبيلة بني خالد
وابو سعد محبته لقبيلته مالها حدودوانتم من جماعته المذكورين بالطيب والكرم والعلوم الغانمة الله لايقطعنا منكم وجعلنا دائما متواصلين على المحبة والخير.
كما اشكر والدكم العزيز على دعمه لمنتدانا ولا فيه قصور لبني عمنا اهل الجوف.
بارك الله فيك يابن عمي وجعلك واهلك ذخر لجماعتكم.


محبكم صقر الخوالد

[^نايف]

لاهنت يالقرم

[^نايف]

أشكر جميع الأخوة على مرورهم الكريم

وللجميع تحياتي واحترامي

[إبن الشمال]

بسم الله الرحمن الرحيم

وعليكم السلام ورحمة الله وبركاته


اخواني لا شكر على واجب

وإن شاء الله نتواصل على الخير والمحبة

وبإذن الله ،،، سوف ترون من ابناء الجوف ما يسركم

ودمتم لي اخوة اعزاء:
اخوكم إبن الشمال

[بنت الشيوخ]

الرسالة الأصلية كتبت بواسطة ابن سويحه



بارك الله فيك
:))

[إبن الشمال]

الله يبارك فيك اختي بنت الشيوخ

وهذا اقل شي نقدر نقدمه

تحية اخوك:
إبن الشمال؛؛

[خالدي فاهم]

السلام عليكم


لاااااااهنت ياخوي نايف وسلمت يمينك
وصح لسان شاعرها ابن غشام صح لسانه ملايين مجهود أكثر من رائع ومااقدر اعطيه حقه

وماقول الا صح لسانه

[^نايف]

أخوي خالدي فاهم
شكرا لمرورك

[مقدام الخالدي]

السلام عليكم ورحمه الله وبركاته

الشاعر ابو سعد الجبري غني عن التعريف

بيض الله وجهك يا بن الشمال على هذا الطرح

[ابو دريع]

الله لا يهنك يمقدام

ومشكورين على مرورك

[خالدي فاهم]

يااااااااااااااااااااا هلا والله

[صقر الخوالد]

يا هلا بابناء هبس

وشكرا لردودكم

[إبن الشمال]

ومن قال
عليكم السلام ورحمة الله وبركاته
حياك الله مقدام الخالدي
واشكر لك مرورك

[مفارق]

مساكم الله بالخير
.
.
.

سلمت يانايف والله يعطيك العافيه


تحياتي

[ابو دريع]

حياك الله يامفارق وشكرا لمرورك

والله لا يهين الاخ نايف والاخ ابن الشمال على تزويدهم لنا بهاذه القصائد

[الشريف أحمد]

السلام عليكم ورحمة الله و بركاته

أود أن أسألكم عن آل جندان في شرق الجدزيرة العربية هل هم من بني خالد؟

و من أي قبائل بني خالد؟

ليتكم تفصلون في أنسابهم

و هل في الشرقية أكثر من جندان؟