قصيده مدح واعتزاز للشاعر المرحوم /عبدالله بن سالم العويّض الخالدي

[هب الريح]

قصيده للشاعر المرحوم

عبدالله بن سالم العويّض الخالدي

وقد ذكر هذه القصيده لشدة تأثره

عندما راى بقايااطلال اجداده وقبيلته

وشتاتهم وبعده عنهم ولظى حرارة فراقهم ..

ويقول فيها..



قال ابن سالم بدأ في راس مابانـي
رجمً طويلً يحود اللاش من دونـه

ساعة بديته وشب القلـب نيرانـي
والعين هلت غزيرالدمع محزونـه

واليا وطيت المنـازل دار جدانـي
دار العريعربهاالشيبـان مدفـونـه

حلت طليله وحلة عيـن بستانـي
هي كلها ملكنـا وهلـي يذكرونـه

وأمهيض الجاش مني بعد عرباني
صبرت غصبً وكن النفس مرهونه

ياطارشي وارتحل فـوق سيدانـي
وارد جديدً علـى شفـي يجيبونـه

سواقه اللي بسيره مايجـي وانـي
مايغدي الوصف لاجود دركسونـه

يمشي من بلادنا لابـان فجرانـي
منصاك ربـعً لمكتوبـي يفلونـه

سلم عليهم عدد ماهلـت امزانـي
واعداد ماحج بيـت الله يزورونـه

الاد خالد واسمهم للعـرب بانـي
هذا جوابي وكل النـاس يدرونـه

يفرح بهم من نصاهم بالوطن عاني
والباب دايـم مبطـل مايصكونـه

ذباحة الحيـل للظيفـان كرمانـي
سلمً لهـم مـن قديـمً مايخلونـه

الاد خالد ابـن قيـس وعدنانـي
مكتوب في كـل تاريـخً يفلونـه

حريبهم ماينـام الليـل سهرانـي
من ذلته في كرى نومه يهجدونـه

من قصرشامً يحده حلـه اعمانـي
ديرة بني خالد والمـدح يشرونـه

من لابةً تجعـل الارواح نيشانـي
والعمر في حل ماجوبـه يبيعونـه

والختم صلوعدد ماهلـت امزانـي
على النبي الهاشمي ياللي تعرفونه


وهذا تحليل لبعض من ابيات القصيده ومالمقصود بها ..

2) ساعة بديته وشب القلب نيرانى
والعين هلت غزير الدمع محزونه
(وهويقصد بهذا البيت عندما اعتلى الرجم او الحزم الذي يشرف على منطقة الاجداد ومساكنهم

3) والياوطيت المنازل دار جداني
دار العريعر بها الشيبان مدفونه
ويقصد بهذا منازل الاجداد والتي تسمى بالبديع او البدع وهي المنطقه القريبه من جبل غريميل شمال العيون والذى حدثت به الغارات و الحروب على بني خالد

4)حلت طليله وحلة عيـن بستانـي
هي كلها ملكنـا وهلـي يذكرونـه
والمقصود بها مقرالاسره وهي التي بها عيون الماء والبساتين
وبهاسكن وبيوت لعوائل بني خالد مع احلافهم من الفضول والزعوب
وحاشيتهم وغيرهم ..

5)وأمهيض الجاش مني بعد عرباني
صبرت غصبً وكن النفس مرهونه
يعبر الشاعر بهذا البيت عن شدة المه ببعده عن ابناء عمومته
واحساسه بحرارة فراقهم وعدم استطاعته معرفة اماكنهم
واين رحلوا كالانسان المرهون او السجين والذىلا حيلة له..

وبقية الابيات طبعاً ماتحتاج تحليل وارجوا ان لا اكون اثقلت عليكم
بتحليل الابيات وتقبلوا مني اجمل التحايا ودمتم برعاية الله

[سحايب العازمي]

هب الريح
قصيده طيبه ونقل موافق انشاء الله
تقبل تحياتي لك وتقديري

[سرحاني الجوف]

لا هنت يالغالي على نقلك للقصيدة وعزالله انها قصيدة مليانة للشاعر عبدالله العويض الخالدي رحمه الله , وهذا هو القصيد اللي نبيه اللي فيه علوم الرجال . مانبي قصايد كذابه يؤلفها البعض هاليومين ويقول هذا جدي وهذا عمي قالها . سلمت ياهب الريح وتعداك الشر

[هب الريح]

الاخت سحايب العازمي

يشرفني مرورك

الف شكر

[هب الريح]

الاخ الغــــالـي

سرحــــانـي الجـــوف

جعلك سالم يا اخوي وعسى الشر مايجيك انشاء الله

وما قصرت يالذيب الله لا يقصربيومك

>>>>>> شرفتني طــال عــمرك <<<<<<

[صديق الملتقى]

عز الله انك كفيت ووفيت يالغالي على القصيدة الجزلة لابن عويض الخالدي , لك تحياتي

[شداد الجريدي]

هلا فيك يا هب الريح على النقل الجميل لقصيدة العويض الخالدي الله يرحمه , والله انه رجال بحق وحقيقة . قول وفعل , ماهو مثل بعض الرجاجيل اللي يؤلف القصص والقصيد ويقول هذي قصايد اجدادي وبطولاتهم , يخسأ هالعفن الكذوب , تسلم لي ياهب الريح

[السرحاني]

سلمت وسلمت وسلمت ياهب الريح على الاختيار الطيب لقصيدة عبدالله بن عويض الخالدي رحمه الله . وهي قصيدة نابعة من قلب صافي ومن حمية على قبيلته , ولكن بعض العرب الخايبين يؤلفون شعر ويقولون ترى جدانا كانوا فرسان وشجعان , بينما هم من اجبن الناس وتاريخهم اسود , ودمت ياهب الريح بصحة وعافية

[روس الخوالد]

هلا وغلا يابن العم

كفيت ووفيت .. قصيدة الشيبه رحمة الله عليه

غنيه عن التعريف ومن قراها ما يملها ابد

كلمات مؤثره وابيات موزونه ولا يجيبها الا شاعر

متمكن وخبير في بحور الشعر .. الله يغفر له

وجعله الجنة البارده ...

ومشكور يا ابو احمد على هالنقل الطيب وبارك الله فيك

[هب الريح]

الاخ الغالي

صديق الملتقي

ماعليك زود يالنشمي وابشر باللي يسرك طال بقاك

ومشكور على حسن الرد .... بيض الله وجهك

[هب الريح]

هلا فيك ياشداد الجريدي

والف شكر على مرورك المتميز اللي اسعدني ..بارك الله فيك ..

[هب الريح]

السرحاني

تسلم والله وبيض الله وجهك ياطيب النبا وبارك الله فيك

والله يعطيك العافيه

[هب الريح]

روس الخوالد

هلاً بك يابن العم

والله لا يهينك على حسن تعقيبك على القصيده

وجعل من جابك للجنه.. الف شكر

[ابراهيم العريفي]

هب الريح تسلم ياخالدي على هذا النقل الرائع والمميز لقصيدة الشاعر المرحوم عبد الله

بن سالم الخالدي الله يعطي عظامه الجنه وبيض الله وجهك ......


ولك تحياتـــــــي,,,,,,,,,

[هب الريح]

الغالي : ابراهيم العريفي

ما عليك زود يا لشيخ وهذا والله من طيبك

جعل والديك الجنه

لنا الشرف طال عمرك وياهلا والله ومرحبا

[المستشار]

الاخ الكريم هب الريح
السلام عليكم ورحمة الله وبركاته
اشكرك يااخي هب الريح على حسن اختيارك لهذه القصيدة المعبرة والمؤثرة للشاعر المرحوم عبدالله بن سالم بن عويض الخالدي , والقصيدة بدأها الشاعر المرحوم بالبكاء على اطلال جماعته وقبيلته وعلى اثارهم الذي اصبح خرابا تسكنه الغربان والفئران , انها قصيدة مؤثرة بكل ماتعنيه هذه الكلمة من معنى , والمتذوق للشعر عندما يقرأ هذه القصيدة سيطلق الزفرات والحسرات على ماضي ذهب وزال الى غير رجعة . وشاعرنا رحمه الله اقتدى وسار على نهج الشعراء الكبار في العصر الجاهلي الذين كانوا يبدأون قصائدهم بالبكاء على الاطلال . شكرا لك ياابو احمد مرة اخرى والسلام عليكم

[هب الريح]

وعليكم السلام ورحمة الله وبركاته

ياهلا والله بعميدنا الغالي :- المستشار

وشرفتنا طال عمرك

والله لا يهينك على تحليلك المتميز للقصيده

وعز الله انك هيضت المكنون بحسن تعبيرك

وشرحك الوافي جعل ربي يطيل بقاك ويحفظك

ولا يحرمني من مداخلاتك يالغالي ..

تقبل مني كل الود والاحترام

[ابن الاجواد2]

الاخ الغالي هب الريح
بيض الله وجهك على نقلك للقصيدة التي يفخر بها ابناء بني خالد

ونرجو المزيد من القصائد وتقبل فائق شكري

[هب الريح]

ابن العم :- ابن الاجواد

تسلم والله وبيض الله وجهك
ياطيب النبا وبارك اللـه فيك

ابشر باللي يسرك يابعدي.

[هب الريح]

للتفعيل (( وكل عام وانتم بخير

[روس الخوالد]

ترفع للخوالد خاصه

وربي يرحم تراب قايلها ويسكنه اعلى منازل الجنه

كل عام وانتم بخير

وعساكم من عواااااده