عـنـد الــــخــــوالــــد طـاب كـيـفـي وانـا مـريـف

[ابن سويحه]

(عند الخوالد طاب كيفي وانا مريف)









لاضاق بالي واختفى كل هابي=شرقت يم بيوت ربع على السيف


لاني بحاتي مصرفي والزهابي=عند الخوالد طاب كيفي وانا مريف


يشهد لهم جوباح(1) بعصر الركابي=وعلى الطوى ناموا وخلوه للضيف


لو انت مر علقم مايذابي=تلقى بهم عزمع الناس ماشيف


وان صكتك بقعا على كل بابي=تلقى بيوت مشرعات على الكيف


فيها الصخا والجود شيب وشابي=ومفطحات فوق كبر المناسيف


وعند اللقا رجالهم مايغابي=كل يقول اليوم يومي عن الحيف


وصغيرهم بالمعركه مايهابي=الين خيل القوم تصبح مناكيف


لاثار عج الخيل كنه سحابي=خوالد فوق المهار المشاحيف


كم شيخ قوم طاح حدر الركابي=وتقاطعنه صاطيات الخواطيف
ـــــــــــــــــــــــــــــ8ــــــــــــــــــــ ــــ
وسلامتكم


الشاعر\فهد البخيت الحربي
<<القصيم>>

(1)جوباح:هو اسم القدر الذي كان الشيخ زيتون الشويش الخالدي رحمه الله
امير الظهيرات من بني خالد يعد الطعام به لضيوفه وكان يتسع لخمسة خرفان

[النمر]

صح لسان فهد بخيت الحربي.
شكراً لك اخوي ابن سويحة على
عرض هذه القصيدة الجميله

[ابن سويحه]

حياك الله الغالي النمر
والشكر بعد الله سبحانه
لشيبانا
الله يغفر لهم

[الشريف أحمد]

والف نعم
ببني خالد جميع

[ابن سويحه]

الله ينعم بحالك
ماعليك زود
وشاكر لك مرورك اخوي الشريف
حياك الله